වැඩ කරන ජනතාව සිය අයිතීන් දිනා ගැනීම අර්ථවත් කිරීම සඳහා පෙළ ගැසෙන මැයි දින සැමරුම් කොවිඩ් -19 වසංගතයට මුවා වී නවතා දැමීමට ආණ්ඩුව ක්‍රියා කිරීම සම්බන්ධයෙන් ඩා බිඳු සාමූහිකය බලවත් විරෝධය පළ කරයි.  වසංගත ව්‍යාප්තිය වළක්වා ගනිමින් රටේ ජනයා අවදානමෙන් මුදා ගැනීමට අවශ්‍ය ක්‍රියාමාර්ග ගැනීම මේ මොහොතේ කළයුත්ත වුවත් නිසි අවස්ථාවේ සුදුසු ක්‍රියාමාර්ග නොගනිමින් සෞඛ්‍ය අංශ ලබා දුන් උපදෙස් පිළිනොපදිමින් කටයුතු කිරීම බරපතල තත්ත්වයක් උද්ගත වීමට හේතුව විය. එහි වගකීම ආණ්ඩුවේ බලධාරීන්ගේ භාර ගත යුතුව තිබියදී සිදු කොට ඇත්තේ සමස්ත වැඩ කරන ජනතාවගේ අයිතීන් උල්ලංඝනය කිරීමයි.

පසුගිය වසර දෙකෙහිදී ද පාස්කු දින ත්‍රස්ත ප්‍රහාරයට මුවා වෙමින් හා කොවිඩ් වසංගතය හේතුවක් ලෙස දක්වමින් මැයි දින සැමරුම් අවස්ථා අහිමි කිරීමට පාලකයෝ ක්‍රියා කළහ.

කොවිඩ් වසංගත තත්ත්වය නිසා වඩාත් පීඩාවන්ට ගොදුරු වූයේ නිදහස් වෙළඳ කලාපවල සේවය කරන ශ්‍රමිකයන් බවද ඩා බිඳු සාමූහිකය අවධාරණය කරයි.  වසංගතයේ පළමු හා දෙවැනි රැළිවලදී බොහෝ සේවක පිරිසක් නිරෝධායනයට යොමු කළ අතර ඇතැම් කර්මාන්ත ශාලා වසා දැමීමට සිදු විය.  එහි ප්‍රථිඵලයක් ලෙස සේවක වැටුප් හා දීමනා කප්පාදු කළ අතර අදටත් මෑන් පවර් සේවකයෝ පීඩාවට පත් ව සිටිති.

සමස්ත වැඩ කරන ජනයා වසංගතයෙන් මුදා ගැනීම සඳහා ප්‍රතිශක්තිකරණ එන්නත් ලබා දීම මේ දක්වා සම්පූර්ණ කර නැත.

මහ බැංකු වාර්තා  පෙන්වා දෙන අන්දමට සේවා කප්පාදුව අතරතුර පවා සමාගම් ලාබ උපයා තිබියදී රජය කම්කරුවන් නොසළකා හැරීම හෙළා දැකිය යුතුය.

එවැනි පසුබිමක රැකියා පරිසරය තුළ සෞඛ්‍ය ආරක්ෂණ පහසුකම් ප්‍රවර්ධනය කළ යුතු බව අවධාරණය කරන ඩා බිඳු සාමූහිකය  සමාගමයේ නිදහස තහවුරු කිරීම, සමාජ සංරක්ෂණය, රැකියා සුරක්ෂිත බව වර්ධනය කිරීම මෙන්ම සේවා ප්‍රතිලාභ භුක්ති විඳීමට අවස්ථා  ලබා දෙන මෙන් බලධාරීන්ගෙන් ඉල්ලා සිටියි.

What's your reaction?
0Cool0Upset0Love0Lol

Add Comment

to top